പാഠങ്ങള്‍

 പാഠം  ഒന്ന്    പശു
 അമ്മ എനിക്ക്  കാച്ചിയ പാല്‍ തരും
  അത് കുടിക്കാഞ്ഞാല്‍  അമ്മ കരയും
 എന്തിനാ  അമ്മ  കരയുന്നത്
ഞാന്‍   അച്ഛനോളം  വലുതാവണം 
 അതാണ്  അമ്മക്കിഷ്ടം 


പാഠം രണ്ട്  പോത്ത്
അമ്മ എനിക്ക് ട്യുഷന്‍  തരും
ഞാന്‍ മടിച്ചിരുന്നാല്‍ നല്ല അടി തരും
എന്തിനാണെന്നെ അടിക്കുന്നത്
ഞാന്‍ ക്ലാസ്സില്‍ ഒന്നമാനാകണം
ഇല്ലെങ്കില്‍...........
അമ്മ  സൊസൈറ്റിയില്‍   നാണം കെടും   

കമ്യുണിക്കേഷന്‍ ഗ്യാപ്

വീട്ടില്‍ മൊബൈല്‍ ഫോണുകള്‍ നാലെണ്ണം  ആയിരുന്നു 
പിന്നെ ഒരു ലാന്‍ഡ് ഫോണും
  ബ്രോഡ് ബാന്‍ഡും ത്രീ ജി  യുമൊക്കെ ആയപ്പോള്‍
 അയ്യാള്‍  വെറുതെ അഹങ്കരിച്ചു
  ഇനി വിവരങ്ങളെല്ലാം  വിരല്‍ തുമ്പിലാണ്
 എന്നിട്ടും  തൊട്ട അയല്‍പക്കത്തെ  മരണം 
ചടങ്ങുകളെല്ലാം  കഴിഞ്ഞു  നാലാം ദിവസമാണത്രെ
 അയാള്‍ അറിഞ്ഞത് 

പ്രണയം

 ഒരു മിസ്ഡ്  കാളിലാണ്‌ തുടങ്ങിയത്
  എസ എം എസിലൂടെ  വളര്‍ന്നു
  ബീച്ചിലും  ഐസ്ക്രീം  പാര്‍ലരിലും പടര്‍ന്നു
  ഒടുവില്‍ രജിസ്ട്രാപ്പീസിലാണ് സാഫല്യം നേടിയത് 
  പുതിയ കണക്ഷനുകളുമായി  അവനിപ്പോള്‍
  എപ്പോഴും പരിധിക്കു പുറത്താണ്  
  കാള്‍ കഴിഞ്ഞുപോയതുകൊണ്ടാണോ  എന്തോ
   അവളിപ്പോള്‍  പ്രതികരിക്കാറേയില്ല !

സഹോദരി  തീവണ്ടിയില്‍  കയറരുത് 

       (ക്ഷമാപണത്തോടെ   സൌമ്യക്ക്‌ )

സഹോദരി  തീവണ്ടിയില്‍  കയറരുത്
കയറിയാലും  ലേഡീസ് കോച്ചില്‍ പോകരുത്
മൊബൈലില്‍ സംസാരിക്കരുത്
ഒറ്റക്കിരിക്കരുത്  സ്വപനംകണ്ടുറങ്ങരുത്
കാലന്‍ ഒറ്റക്കയ്യനായി വരുന്നതെപ്പോഴെന്നറിയില്ല !

സഹോദരാ പ്രതികരിക്കരുത്
ഓഫീസ്  ടൈം കഴിഞ്ഞാല്‍ ഒട്ടുമരുത്‌
വീട്ടില്‍ പെണ്ണും പിള്ളേരും കാത്തിരിക്കുമ്പോള്‍
വേണ്ടാത്ത  പോല്ലാപ്പിനൊന്നും പോകരുത്  !

 സുഹൃത്തേ  ചങ്ങല വലിക്കരുത്
സഹയാത്രിക വീഴുന്നത് കണ്ടാലും
അന്വേഷിക്കരുത്
വൈകുന്നേരത്തെ  പരിപാടി മുടങ്ങും
വേണമെങ്കില്‍  ന്യൂസ്‌ അവറില്‍
 ഒരു എസ് എം എസ് അയക്കാം
ചാകുന്നവള്‍ക്കങ്ങു  ചുമ്മാ ചത്താല്‍ മതി
ജീവിച്ചിരിക്കാനാണ് പ്രയാസം! 

സൗഹൃദം

തീവണ്ടിമുറിയില്‍ ഞാനും അവളും തനിച്ചായിരുന്നു
യാത്ര തുടങ്ങിയതുമുതല്‍ ഞങ്ങള്‍ സംസാരിച്ചുകൊണ്ടെയിരുന്നു
എന്നിട്ടും
യാത്രക്കൊടുവില്‍
ഒരു പുഞ്ചിരിപോലും കൈമാറാതെ പിരിയുമ്പോഴും
ഞങ്ങള്‍ തീര്‍ത്തും അപരിചിതരായിരുന്നു
പക്ഷെ
അപ്പോഴും
ഞങ്ങള്‍ സംസാരിച്ചുകൊണ്ടെയിരിക്കുകയായി രുന്നു
സ്വന്തം സെല്‍ഫോണില്‍ ആരോടൊക്കെയോ !